Lirik Lagu Dayak Ngaju Kalimantan Tengah : Budi p - Andi putir busu

Palus lembut bahing kandayu
pahayak pasim Tuhan je ngambu
hapan ku narusan je lawang kuwu
manggarak atei andi putir busu

hetuh aku munduk manimang
riwut manampuh je baung tunggang
uka mambuka je kunci lawang
manggarak atei andi tajahan huang

balaku tagarak atei muh andi
tahaseng inarik palus ingunci
nduan hambayang je bawi nyai
putir busu pintar harati

amun andi mambuka mata
inyewut ku uras asal tampara
katurunan adam ewen ndue hawa
tagarak atei andi intan garinda

balaku andi hingkat bagulung
hayak tagarak je huang itung
palus tabuka je kancing karung
kahalap andi hatun eka tendung

aku kakam manyampai huang
manderuh tiruh mu busu pandang
mangat mahining je tandak timang
kakam dumah harun bara tumbang

mudahan andi bajeleng misik
ateiku kakam puna tatarik
kahalap andi kanjeran usik
pahayak nahiau kacapi kalasik

kahandak ku andi manggarak ikau
manderuh tiruh mu bawin kariau
hajamban karungut kacapi mahiau
tabe na andi salamat hasundau

andi hingkat je bujur buah
aku kakam handak bakesah
kilau anak jata manuah
pasi aku je harun dumah

kapasi andi kabuat melai
batiruh malis kapuh bahalai
aku kakam tuh harun sampai
tabe na andi kambang sarunai

hayal tiruh muh busu andi
tiruh ngabuat ampim masi masi
hindai atun manyarurui biti
baya mamangkut gagulung hai

lalau tiruh muh putir busu
melai kabuat je pasi tutu
balaku pasim hatala ngambu
tau mamambai kalunei aku

hayal tiruh muh busu pandang
tiruh muh malis dia gagampang
amun tau manumun huang
mamabai bereng aku pangarang

ituh andi je bawi nyai
akan tanggeran tuah razaki
bandingan kain takuluh kudi
pantas kaleka basarah diri

kahalap andi dia langena
bandingan kilau je bawin jata

bacahaya ampin intan permata
tagarak atei je jagau linga
awi kahalap dia laluen
jatun tandingan intu kalunen

angat atei dia bareken
ela sampai tindar kan beken
mangat andi manumun auh
akan bahatam menter batiruh

salamat hambilang andi bawi mantuh
andau jewu aku kakam masuh
kanjeran tiruh mu busu andi
mahining peteh kakam ilihi
aku handak paramisi buli
hajamban kilat lading balati

kalau te helu karungut ingumang
tahiu andi je busu pandang
amun malayau je atei huang
tau mantehau hambaruang layang

tikas tuh bewei kambangan lagu
panyundau ku melai lewu keju
tarewen nampayah je putir busu
marusak atei kalunen aku

Youtube : Budi p - Andi putir busu

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel