Lirik Lagu Dayak Ngaju Kalimantan Tengah Antang - Bilton

Sahelu bara palampang kesah
balaku ampun je kula tundah
tuntang jatah awang manuah
auh je tapas keleh inambah

iyoh dengan antang patahu
tuntang jatah hatala ngambu
balaku umaba nyaruri aku
nahiu kesah katika helu

jetuh kesah je jaman usang
menjadi melai je lawang kupang
ongko dulah huran inarang
sawa manahi garing tarantang

dulah huran tambakas lewu
budi basara bahalap tutu
dengan kalunen saraba tau
kutak pander auh balemu

huang sinde andau katika
dulah batulak inyuhu sawa
tege ije angat kamia
mipen atei metu akan pangina

dulah palus batulak mengan
hayak hanjewu je limbah kuman
tihin sawa jalatien bulan
salenya mipen barang panginan

dulah manajung bilik balingau 
kumbang kurah je bahu lakau
jatun ije metu je sundau
dia katawa hamalem handau

kanih kate je tanjung tetei
nampayah andau jadi halemei
pehe angat je huang atei
jalan buli dai baretei

dulah manajung sambil manggayar
kakaput andau je sasar miar
pasuruh ije lunuk bajangkar
hete iye palus basandar

dulah basandar je sambil munduk
melai hunjun je uhat lunuk
isin sipet hete inyucuk
dia betiruh tuntang mangantuk

sadang jadi kutahi hete
hining kahabut kalunen are
pander karas ureh tatawe
kilau je hanjak angat pangkeme

dulah palus tengak tangera
manggau auh je kutak bata
bara hete hining suara
mantehau uluh je aka umba

hete ewen tinai hakutak
mangguang sawan je dulah manak
amun bue ulih batulak
ayu itah je hayak hayak

palus tarewen ja angat dulah
mahining auh tege manumbah
bara hunjun eka basantah
mander kapehe puna karinah

aku dia ulih batulak
paingkuh pehe kilau imasak
hayak dia ulih manggarak 
tacucuk tunggul ije habisak

auh kutak ewen te benyem
marak andau je kaput pijem
sakira jadi je bentuk alem
pangkeme dulah paham badarem

bentuk alem jadi mahalau
mahining tinai auh mantehau
baya hamauh je bara kejau
anak te kua hatue jagau

auh te kua palus masanan
manumba pisek je dia gitan
ampi panyakit ulih manduan
metuh pangawi inutuk lipan

auh jete uras nyaragan
huang atei dulah te huran
jatun ije uluh katawan
awi puna die isanan

sana andau jadi hanjewu
dulah tulak bara upun kayu
ampi jalan tarang batantu
sanjulu angat je sampai lewu

dulah sampai je huma
palus mangguang lawang salaka
bakumpul uras je tundah kula
nampayah anak jagau bakena

sampai katika anak nahunan
dulah mangumpul kula jalahan
ngambun inampa je ara huran
awi manumun auh pansanang

ngambun ai je jala jalan
jatun buah peres kahaban
rajin mandohop kula jalahan
tingkah je sala je dia gitan

ngambun jadi sadang kabujang
ulih mahaga je panting kambang
uras nyarui je itung huang
pna jatun ampi kakurang

amun mahining je usang naha
pasangan iatur je indu bapa
mangawin nambun manampa pesta
bakumpul uras je kula tundah

hete bulah jaga bahimat
mikeh bahaya tau manyasat
auh je hining halajur bahimat
metuh mengan tulak kabuat

panganten ngambun je limah kuman
batok ihup palus induan
dulah manehep hayak inganan
intu hete je tege lipan

awi te ngambun baumur panjang
eka inampa kilau karanjang
bakun inggare kilau karanjang
mangat uluh murah manggatang

palus mansanan je eka melai
dia huang puruk barangai
tapi melai je riang bungai
hila ngawa tumbang marangai

hete ngambun palus ihaga
tuntang inampa je aka pasah
kalute gawin je kula tundah
andau harian tau manuah

telu bulan je ngambun hete
babulu antang je pai lenge

anak esu puna nanture
narai sebab taluh kalute
tapi ngambun tege manarang
akan karen garing tarantang

ela hengan je itung huang
aku tuh kareh manjadi antang

baya huang bulan kauju
tikas te ketun manyenguk aku
mansanan akan je anak esu
bele ketun karas manggau

aku tuh gaib manjadi antang
mansanan akan je kula nduang
manabur behas bahenda bahandang
amun intehau aku mangguang

pelai ku palapas hila gantau
mangat jete manjadi suntuk
amun ketun mantehau aku
uka dia tau kaliru

dia baya je jaman usang
wayah jetuh tatap ingganang
eweh bewei tau manimang
manumun angat je itung huang

antang intehau huang kapakat
amun tege taluh manyasat
ukat ie je tau mawat
nyarurui itung malalus niat

kalute saritan je jaman usang
tege kalunen manjadi antang
kesah nyata dia ingarang
haranan ulu baumur panjang

tikas tuh helu sarita lampang
paramisi dengan patahu antang
tuntang kareh jata sangiang
manenga simpei ja bambang penyang


Youtube : Bilton - Antang

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel