Lirik Lagu Dayak Ngaju Kalimantan Tengah Rantian Marantika - Patiruh anak

Batiruh anak je busu tempu
batiruh sampai andau hanjewu
katawan bapam halisang keju
manggau penyang je sangkalenmu

batiruh anak garing tarantang
batiruh sampai je andau mandang
katawam bapam tahi halisang
manggau simpei je bmbang penyang

batiruh anak bawi haruei
batiruh sampai andau halemei
katawam bapam tulak namuei
manggau penyang bambang karuhei

batiruh anak tarantang raja
batiruh sampai andau balawa
bapam halisang je bara huma
kanuah bulan je bawin jata

batiruh anak hatuen balanga
batiruh anak je tempu jata
anak busu jagau bakena
pintar harati belum baguna

batiruh anak ujau maliti 
batiruh malis sampai hanupi
mudahan kahandak uras manjadi 
kanuah penyang pintu rajaki

batiruh anak keleh harati
anak busu je ije biti
aku indum handak barapi
manambang bapam dumah bagawi

batiruh anak jata manuah
anak panengan sahur parapah
marapus anak ampin kasusah
manunggu bapam je jatun dumah

kan kueh kia pandarin bapam
kilau jatun kapasie dengam
mudahan asi halajur akam
belum batuah nyangkelang kulam

batiruh anak panatau jagau
batiruh sampai hamalem andau
bapam tahi malihi ikau
manggau penyang karuhei tatau

tege kabar mahalau pinding
nampuh pahayak riwut bataling
bapam mandai bukit kaminting
kanuah anak je bawin nyaring

manumun alamat je huang nupi
bapam namuei je asi asi
kejau bara tuah rajaki
dia manumun ampin taluh je jadi

metuh bapam je netep huma
batarung tutu je ngaju ngawa
amun ku mitung je usang nuha
bilang mahantis je danum mata

pasie nah anak garing tarantang
bapam antang layang tarawang
tarung bapam je haganggurang
manandang jalan tanduhan usang

batarung bapam je jaman huran
mariak batang danum kahayan
manuk dadugan sarapat intan
palampang intan je kaharingan

jete nah anak akan pangingat
mudahan ketun anak uras salamat
sahur parapah eka bahajat
ela tasidat pedoman ingat

batiruh anak je busu damang
anak panatau karambang huang
karungut indum are bajangkang
jete induan je akan penyang

akan penyang panggirik lingu
batiruh anak tarantang busu
karungut indum balaku laku
mudahan asin Hatalla ngambu

marak manuyang atei kapehe
mambelum anak je biti are
kilau mambelum tarantang nule
sangkelang mahantis je danum mate

batiruh anak je bungas jagau
anak busu turus panatau
pikiran indum je laya layau
munduk manangis satiap andau

ketun anak uras harati
pasie itah je belum ngasi
ilihi bapam halisang tahi
manggau penyang tuah rajaki

balaku asi sahur parapah
uka nganggupung pambelum itah
Ranying Hatalla eka basarah
pea katika je bapam dumah

batiruh anak je tempue jata
garing tarantang busu tabela
umpama bapam je atun maja
mbawa hambaruaa je buli huma

buli bulau je hambaruan
tarantang raja manuk daduga
dumah bara tanjung jalanan
mimbit karuhei penyang pasihan

misik anak ujau maliti
pahayak penyang tuah rajaki
mudahan pintar anak tuntang harati
manyambung tihang bandera hai

misik paung je tewu nyawung
panyambung tihang bandera gantung
misik kalawa je tiruk itung
belum batuah tatau manyambung

iyuh nah anak garing tarantang
panyambung tihang bandera panjang
karungut indum rawei bajangkang
haranan manyyang pikiran pusang

misik anak balanga hinut
misik pahayak penyang sambalut
panenga nyai je inai mangut
uka anak belum tatau basewut

misik anak jagau mangawan
misik mimbit penyang pasihan
bapenyang tatau ureh malawan
akan tanggeran ungkup babuhan

sampai hetuh karungut ikei
patiruh anak jagau haruei
ilihi bapae tulak namuei
indue melai paham kapehe atei

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel