Lirik Lagu Dayak Ngaju Kalimantan Tengah Melati - Patiruh anak bisa salaka

Tabe salamat je tundah kula
bawi hatue bakas tabela
aku handak amngambang sarita
batiruh anak bisak balaka

lembut atei handak hakutak
manyampai isut karangan pandak
asin Hatala dumah pahayak
manyangka atei patiruh anak

tiruh anak je busu tempu
tarantang pating je kayu lingu
anak panengan Hatala ngambu
pintar harati manjadi suntu

suninah busu je melai tuyang
tiruh anak garing tarantang
hajamban auh je tandak timang
mangat sarutam hadurut lampang

hajamban auh je timang tandak
mudahan Tuhan tau pahayak
ibarat haring tau nyalampak
bapam indum baatei handak

amun ikau je panjang hai
rajin sakula mangkat harati
ela mandajal malas bagawi
mangat Hatala halajur masi

sapala indum narantang bitim
belum hatuah are rajakim
eka karajin je buem tambim
nah mina mamam kula paharim

anak busu bakena ampi
je turus paras je ampin biti
sayang hindai kambu kahai
mundahan belum are rajaki

suni nah busu je melai tuyang
tiruh nah anak kalekahuang
manyun ku ikau je melai banang
je aku indum muhun mandulang

tiruh anak bisak salaka
turus panatau kaleka cinta
anak panengan jata Hatala
sama kilau anak Cina balanga

mudahan ikau hagatang taring
amun sakula titel gantung
kilau bandar anak tamanggung
belum batuah manyanang itung

amun nantumba angat kasusah
je malas aku manampa kesah
mahi je umba je riuh rndah
mundahan Tuhan masi nampayah

rancak aku munduk manure
haranan belum je susah pehe
sama kilau tarantang nule
halajur mangandung atei kapehe

tiruh nah anak je bujur buah
mahining auh karungut kesah
asin Hatala hadurut dumah
manenga karuhei belum batuah

pasi nah anak pambelum itah
ngaju ngawa je kumbang kurah
sukup panyundau tuntang tampayah
manjadi karuhei belum batuah

amun mangkeme angat kasia
bilak mahantis je danum mata
sukup panyundau tuntang payupa
mudahan halajur pasin Hatala

bilang sukup kapehe atei
haranan kangasi pambelum ikei
belum awi je ujau bajei
mamantat gita manete uwei

sukup bewei angat kasia
belum kapehe je melai desa
dia katawan je kabar kota
bapam halajur malihi huma

tiruh anak panatau jagau
suni nah busu turus panatau
bapam nah anak namuei kejau
manggau akam karuhei tatau

mudahan bapam tau barendeng
bingat ikau je bara bereng
batang danum je dia kampeng
je pasi iye buli bajeleng

tiruh anak jagau haruei
kantuk busu sampai halemei
indum anak kapehe atei
mangganang bapam tulak namuei

angat atei kilau i hiris
je kabar bapam anak benyem tunis
rancak indum munduk manangis
amun batiruh dia bakalis

kurang labih je ije nyelu
katahin bapam malihi lewu
manggau akam bulu marindu
karuhei belum tatau baramu

sampai hetuh taluk ingutak
nahiu kesah patiruh anak
mudahan Hatala tau pahayak
rajaki tuah manumun kahandak

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel