Lirik Lagu Dayak Ngaju Kalimantan Tengah Bilton Tongkoy - Anak Lewu

Haranan angat ku puna taharu 
pahiau suling je humbang lingu
kilau pahayak riwut balemu
palampang kesah aku anak lewu

nanggare ku kesah je anak lewu
anak Ud Danum sungei saka hulu
haduring huran nyelu uju telu
hulu sungei miri bahejan liu

amun nahiu dia ulih ingesah 
kapehe belum ininggang kasusah
baya kahandak ku bingat sejarah
kalute kambangan pambelum itah

metuh katabelan anak lewu huran
satiap nyelu mananam malan
mandup malauk dia katapasan
jawau rampang kopu akan panginan

jakai ku bingat je jaman helu
anak lewu sangkum je metuh lau
behas jatun je sampai lewu
satiap andau kuman rampang kopu

katika jete angat asi asi
jakai malan buang dia buli binyi
kasial dumah kejau rajaki
atau andau alem tau gite bari

tapi indang apang ba atei tabah
dia manyarah naharep kasusah
halajur bagawi je saka lepah
balaku rajaki tau rantep dumah

duan pandak kesah huran anak lewu
nampara sakula nyelu hanya telu
tulak bara tana susung hanjewu
halajur mahuru je padang bahu

haranan kahandak tau kilau uluh
ayau anak lewu belum sanunuh
marak kasusah metuh te manampuh
bara sungei miri je huran masuh

amun taingat je wayah jete
anak lewu sakula puna kanih kate
haranan pambelum susah kapehe 
namunan kapasin babuhan are

sadang angat taluh je kamean
panyakit kasusah te dumah mantakan
balaku asin kula jalahan
manyambung itung anak lewu huran

auh kesah bagulung capat
anak lewu sakula ampi ulih tamat
baya baya dinu ijasah epat
sertifikat sakula mambasa nyurat

anak lewu huran mandinu ijasah
balaku gawi dengan kula tundah
tapi ampin syarat te lalau batawah
jaka kilau juhu kurang rarampah

handue katelu balaku gawi
tau melai kantor munduk karusi
tapi jalahan jatun je masi
sama kilau nyalintik je papat bari

dumah kapusang je anak lewu
alamat kasusah dia maku keju
padahal sakula pire pire nyelu
jaka behas bahata are puluh kilu

are bewei angat panyangkum
namuei batang danum injam belum
kinjap godaan dumah mahukum
ngapehe atei angat manggarunum

kilen amping ku badaya denga
nasib anak lewu kalute bagia
baya tege tampengan kalutuh kua
are tutu jalan mangguang rhoma

nduem bewei je jadi mahalau
kasusah belum balaku kejau
balaku dumah karuhei tatau
hatampung simpei penyang panyundau

bahajat balaku pambelum mangat
bereng barigas sanang salamat
hadurut bapa hatue karamat
bue antang ambun halajur mawat

kalute asin jata hatala
mawat anak lewu mangganan saranta
ulih uga ugai manyangkelan kula
anak lewu sinta seni budaya

tandak karungut ku tikas tuh helu
palampang kesah aku anak lewu
hajat ku itah uras mandinu
marajaki are manyambei ambu

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel